पुस्तक परीक्षण

भाषेचा प्रसार माध्यमांत चपखल वापर होणे आवश्यक आहे. तरीही माध्यम जसे बदलते त्याप्रमाणे भाषेचा लहेजात फरक पडत जातो. या बदलांबद्दल, भाषेच्या माध्यमांतील वापरांबद्दल सहज समजनाऱ्या सोप्या भाषेत मार्गदर्शन करणारे पुस्तक म्हणजे ‘प्रसार माध्यमे आणि मराठी भाषा’. ज्याचे संपादन करण्यची जबाबदारी यशस्वीपणे डॉ. भास्कर शेळके यांनी पार पाडली आहे. स्नेहवर्धन प्रकाशन, पुणे यांनी या पुस्तकाचे प्रकाशन करून माध्यमांत आणि मराठी भाषेसही  अभ्यासपूर्ण योगदान दिले आहे.

विद्यापीठ अनुदान आयोग पुरस्कृत राष्ट्रीय चर्चासत्रामध्ये दि.२७, २८ मार्च २०१०रोजी ‘प्रसार माध्यमे आणि मराठी भाषा’ या विषयवार चर्चासत्राचे आयोजन करण्यात आले होते. माहिती तंत्रज्ञानाच्या युगात वावरत असताना, माहितीचा अखंड प्रसार जनसामान्यांपर्यंत होत असताना याच विषयवार तज्ञ प्राध्यापक तसेच वृत्तपत्रे, आकाशवाणी, दूरदर्शन आणि आंतरजाल या माध्यमांतील तज्ञ व्यक्तींनी अभ्यासपूर्ण संशोधन करून शोधनिबंध सदर केले, त्या शोधनिबंधाचे एकत्रित संकलन म्हणजे हे पुस्तक. मराठी भाषेचा वापर माध्यमांत काम करताना वाचण्यात, बोलण्यात आणि लिहण्यात कसा असावा. बातमीपत्रे, मुलाखती, कार्यक्रम सादर करत असताना भाषेचा बाज कोणता वापरावा तसेच माध्यमांचा मराठीत उगम आणि विकास कसा झाला हा इतिहास इत्यांदीबाबींबद्दल तज्ञ प्राध्यापक, मान्यवरांनी त्यांच्या शोधनिबंधातून प्रकाश टाकला आहे.

फक्त पत्रकारितेच्या विध्यार्थ्यांनाच नाही तर मराठी भाषेबद्दल कुतुहूल आणि शिकण्याची प्रबळ इच्छा असणाऱ्यांसाठीही या पुस्तकाच्या अभ्यासातून मराठी भाषा ही माध्यमांसाठी सजवताना कशा पद्धतीने ती सजवावी याचे प्रशिक्षण नाही म्हणता येणार पण ओळख नक्कीच करून देते.